Otbasy – súıispenshilik, syılastyq, yntymaqtyq pen parasattylyq bastaýy, adam ǵumyrynyń tiregi ǵana emes, qoǵamnyń da basty negizi. Osynaý qymbat qazynalar kórinis tapqan «Mereıli otbasy» baıqaýy ónegeli otbasylarynyń aramyzda kóptigimen qýantýda. Solardyń qatarynda Sandyqtaý aýdanynyń qurmetti jandary Mýhınder de bar.
Oblystyq básekede Mýhınder otbasy júldeli ekinshi oryndy jeńip alǵanda jurtshylyq rıza kóńilmen qol soqty. Munyń ózindik sebebi de bar edi. Bul – ınternasıonaldyq otbasy. Ekinshiden, Mýhınder bala-shaǵasynyń, nemere-shópshekteriniń kóptigimen emes, daryndy eki bala tárbıelep, sporttyq jarystarda baıraǵymyzdy bıiktetýimen erekshelengen jas otaý ıeleri. Ulttyq baıqaýdyń mazmuny osy turǵydan da keńeıe túsetini anyq. Aleksandr Mýhın men Sáýle Turlybekova 1993 jyldyń 10 sáýirinde shańyraq kótergen. Jas sportshylar ýaqyttyń qıyndyǵynan ǵana emes, kásibı talaptyń qatańdyǵynan da bolar, Reseıdiń Ekaterınbýrg, Bıısk qalalarynda, tipti, Mońǵolııada turýǵa májbúr bolǵan. Aqyrynda týǵan elge oralyp, mine, 15 jyl boıy aýdan ortalyǵy Balqashynnyń tirshiligin gúldendirýge úles qosýda.
Munda olar aýyldyq jerge asa qajet sporttyń shańǵy jáne bıatlon túrinen jattyqtyrýshy bolyp qyzmetke kirisken bolatyn. Mýhınder súıikti jumysyna bilek sybana kirisip, daryndy balalardy sport álemine tartýmen qatar, óńirde salamatty ómir saltyn qalyptastyrýǵa belsene atsalysyp keledi. Bul kúnderi erli-zaıypty jattyqtyrýshylardyń tárbıesin alǵan jıyrmaǵa jýyq talantty jas sport sheberi jáne kandıdaty ataǵyn aldy. Osy arqyly olar Balqashynǵa irgeles Kamenka selosynyń týmasy, halyqaralyq dárejedegi sport sheberi, 1988 jylǵy Olımpıada oıyndarynyń vıse-chempıony jáne 1987 jylǵy álem chempıonatynyń kúmis júldegeri Vladımır Sahnovtyń, jalpy sandyqtaýlyqtardyń abyroıly dástúrin jalǵastyrýda.
Shańyraq ıesi Aleksandr Mýhınniń ózi bıatlonnan sport sheberi, joǵary dárejeli jattyqtyrýshy bolsa, zaıyby da joǵary dárejeli jattyqtyrýshy ári sport sheberligine kandıdat. Sondaı-aq, Aleksandr Qazaqstan Respýblıkasy Ulttyq quramasyn jattyqtyrsa, Sáýle sportta daryndy balalar mektep-ınternatyndaǵy balalardy shańǵy sportyna baýlýda. Babalarymyz: «Uıada ne kórseń, ushqanda sony ilersiń» deıtin ulaǵat qaldyrýy tegin emes. Adamnyń tulǵa retindegi qalyptasýy otbasynan bastalatyny da daý týdyrmaıdy. Otbasylyq abyroıdy uldary 21 jastaǵy Rınat pen 17-ge kelgen Sasha sportty joǵary tabystarymen eseleýde. Osy uldardyń ekeýi de shańǵy sportynan elimizdiń ulttyq quramasynyń múshesi. Olar Almatydaǵy álem chempıonatynda sátti óner kórsetip, halyqaralyq týrnırlerden júldeli oralýda. Ásirese, kishi Aleksandrdyń aıaq alysy jaqsy. Ol – bıatlonnan Azııa chempıony, komandalyq esepte Avstrııadaǵy halyqaralyq jarystyń kúmis medalin jeńip aldy. Endeshe, Mýhınder otbasyn qalyptasqan sporttyq áýlet deýge tolyq negiz bar dep bilemiz.
– Osynaý ınternasıonaldyq jáne sporttyq otbasy shyn mánindegi bizdiń maqtanyshymyz, – deıdi aýdan ákiminiń orynbasary Vasılıı Gorohovodaskıı. Aýdanymyzdyń qoǵamdyq ómirine belsene qatysatyn olar ózderin úlgili qyrlarymen tanytýy arqyly kópshiliktiń zor qurmetine bólenýde. Mýhınderdi Qazaqstannyń naǵyz patrıottary deýimiz kerek. Bul otbasynyń basty ustanymy Qazaqstan Prezıdenti Nursultan Nazarbaevtyń «Ult saýlyǵy – bizdiń tabysty bolashaǵymyzdyń negizi» degen sózderi.
Baqbergen AMALBEK,
«Egemen Qazaqstan».
Aqmola oblysy,
Sandyqtaý aýdany.
Sýrette: Mýhınder aýdan ákiminiń orynbasary V.Gorohovodaskıımen birge.